Question orale : Gestion de la ressource en eau et réchauffement climatique

REPONSE DE M. SAVERIU LUCIANI

A LA QUESTION ORALE DEPOSEE PAR Mme MARIE
SIMEONI

AU NOM DU GROUPE "CORSICA LIBERA"

OBJET : GESTION DE LA RESSOURCE EN EAU ET RECHAUFFEMENT CLIMATIQUE.

O Sgiò Presidente, care culleghe, cari culleghi, car’amica balanina

Vi ringraziu per sta dumanda chì m’hà da permette di davvi unepochi d’indizii chì vi seranu presentati dinò à l’occasione di u prussimu cunsigliu d’amministrazione di l’OEHC.

Postu ch’è n’avemu chè pocu tempu per risponde, vi possu dì chì i matrali di l’offiziu sò pieni à 99 per centu. Ma ùn vole micca dì ch’ellu ci vole à suddisfaccine è frazà a risorsa, nè mancu fà crede chì l’affari anderanu bè sin’à nuvembre.

L’offiziu hè digià in posta per assicurà a gestione ghjornu per ghjornu di sta situazione. Ne prufittu quantunque per rammentavvi chì in lu 2017 ùn ci hè mai statu qualunque rumpitura d’alimentazione nant’à i nostri retali idrolichi di distribuzione.

À l’accorta, si pò custattà tendenze generale dilicate inquant’à e cunsumazione, postu ch’ella hè principiata l’irrigazione di modu primaticciu, per via d’una sicchia guasi generalizata.

À l’ingrossu, fate contu ch’è no siamu oghje ghjornu, à livellu di e mediane, di mezu maghju in piaghja, di l’entre maghju in u Purtivechjacciu è di fin’ di ghjunghju ma solu per l’acqua agricula in Balagna.

Rinfurzemu quist’annu ancu di più chè annu, è sempre di più, l’analisi di a qualità di l’acqua, chì si facenu oramai di manera sistematica. Per indettu, avemu stallatu in u matrale di E Cotule un dispusitivu di preussigenazione (500000 euros – PEI) per migliurà sta qualità di l’acqua à destinazione di e pupulazione. Per contu nostru, ancu s’è ùn vi possu allistinà l’uperazione, vedite ch’è no cuntinuemu a prugrammazione di u PEI è l’invistiscimenti previsti.

Inquant’à e prugezzione per a stagione chì vene, capiscerete chì per avà s’aspetterà à pena per facci un’idea precisa. In tantu, hè chjara ch’è no ne saperemu di più à mezu maghju, ancu s’è i servizii di l’offiziu travaglianu digià nant’à parechje pussibilità liate à l’evuluzione climatica è à a cunsumazione, regione per regione.

Duie parolle nant’à un’invistiscimentu aspettatu, quellu di u surpressore di U Tagliu chì puderia entre in serviziu st’auturnu. Dopu divvi dinò chì u serviziu d’idroclimatulugia cutighjeghja una vintina di fiumi di modu à cunnosce megliu a situazione, dinò definisce i bisogni è permetteci perfine d’indià prugetti lucalizati.

A Corsica, è ingiru à noi u Mediterraniu riflettenu inseme dipoi un bellu pezzu, moltu più quand’omu campa in un cuntestu isulanu induve e scumesse di u sviluppu economicu, agriculu è sopr’à tuttu umanu ponu periculà à mez’andà.

A Corsica, è ingiru à noi u Mediterraniu riflettenu inseme dipoi un bellu pezzu, moltu più quand’omu campa in un cuntestu isulanu induve e scumesse di u sviluppu economicu, agriculu è sopr’à tuttu umanu ponu periculà à mez’andà.

Per davvi una cunclusione pruvisoria à a vostra dumanda, sappiate ch’ellu ci tocca à piglià in contu stu cambiamentu climaticu di modu glubale, chì hè in core di l’azzione à vene d’ogni pulitica publica. Hè l’affare di tutti !

Ci ci vole dunque à appruntà attori è territorii à l’effetti ch’ùn si puderanu più parà, secondu e vie ammentate da l’ultimu raportu di u Giec. Stu pocu serà pruposta da a Cullettività una campagnata di sensibilisazione generale è d’infurmazione nant’à un usu raggiunatu di l’acqua in tutti i duminii.

In a vostra dumanda, avete mentuvatu u PNACC; ùn vi scurdate ch’è n’avemu vutatu u nostru PBACC chì, da quì à pocu, serà presentatu à e cullettività lucale, e camere è l’inseme di l’attori sucetali, cù precunisazione almanaccate dinò quì secondu e particularità regiunale.

Per andà più in là, rispundendu cusì à l’interrugazione vostra – a ci feremu à passà l’estate tranquilli ? – omu sà chì dipoi u 2017 ci avemu un Cumitatu di Seguitu Idricu Territuriale misincu, in più di quelli isettimanali cuncernendu Pumonte è Cismonte.

Ci permette d’urganizà à a bella megliu una strattegia cullettiva à prò d’una gestione in cunsequenza, cù tutti l’attori pubblichi o privati, da i servizii di u Statu à EDF, Metteò Francia, u mondu economicu è agriculu, e camere, l’eletti, tira avant’è passa.

Dumenica scorsa, u spertu internaziunale Hervé Le Treut a dicia à u Parcu Galea : sò dui l’inghjochi maestri : educazione di e pupulazione nat’à ste prublematiche di l’addattazione necessaria è dinò a nostra capacità d’anticipazione di pettu à sti cambiamenti, di modu à porghje suluzione lucale à l’ecosistemi.

D’altronde, u Pianu Acqua Nostra 2050 - propiu un prugettu d’accunciamentu di u territoriu isulanu - hè in cor’ d’elaburazione. Vi serà spostu per a fin’ di l’annu, à u scopu di dà una perspettiva lungagna à l’azzione nostra per ciò chì riguarda l’impalcatura idrolica.

Eccu per stamane, ancu s’ella mi dispiace d’ùn andà più in là in u detagliu chì u tempu, a sapete bè, ci vene cortu per l’occasione.

Per chjode stu sugettu impurtante, vi feraghju una rimarca nant’à a famosa SOMIVAC, oramai dimezata in ODARC è Offiziu Idrolicu. A cunsunale finale, sta C, ùn’era forse micca tandu quella di a Corsica è di e so brame, ma piuttostu per disgrazia a C d’una visione Culuniale. Ma hè capita chì in u frattempu e pulitiche sò belle cambiate... Meno male, chè ?

Oramai simu in tempu di grilli, dopu à tant’annate di tempu di capretti... Ùn vole dì chì tutt’inseme, decisi ch’è no simu, avemu una Nazione da fà !

Intantu, dopu à st’ochjata, fermu di sicuru à a vostra dispusizione, cara amica, per sviluppà più in là sti punti di primura.

À ringraziavvi.

2019 O1 017 - Gestion de la ressources en eau et réchauffement climatique (2).pdf (290.77 Ko)