Stallazione di u Cunsigliu di a lingua corsa - Accademia corsa di i Vagabondi

L'8 di decembre di u 2012 u Cunsigliu di a lingua corsa è l'Accademia corsa di i vagabondi sò stati stallati in Corti, sala SIMON'GHJUVANNI VINCIGUERRA in presenza di u Presidente di l'Esecutivu di Corsica, di u Presidente di l'Assemblea di Corsica, di u Consigliere executivu in cariga di a lingua corsa, Presidente di u Cunsigliu di a linga corse è di u presidente di l'Accademia corsa di i vagabondi.

U Cunsigliu di a lingua corsa hè un strumentu cunsultativu à prò di l’intervenzione glottopulitica di l’Assemblea di Corsica per a salvezza è a prumuzione di a lingua corsa. Hè dinù u fruttu di l’evuluzione di l’ambizione chè no spartemu per a lingua è di i mezi dati à a pulitica linguistica.
            
A sede di u Cunsigliu di a lingua corsa hè in Corti, in a sala Simon’Ghjuvanni Vinciguerra – Ghjuvanni di a Grotta, grande pueta è resistente di a seconda guerra mundiale.

A creazione di u Cunsigliu di a lingua risponde à un bisognu d’allergà l’amministrazione di a pulitica linguistica di a Cullettività Territuriale di Corsica affinchè di custruisce una pulitica linguistica stabilita nantu à un accunsentu puliticu è sucetale.

U Cunsigliu di a lingua corsa hè strutturatu in cinque cullegi : Eletti, Universitarii, Esperti, Sucetà civile è Membri furesteri.      

U Cunsigliu di a lingua corsa averà in carica u seguitu è a valutazione di e pulitiche cundutte, ma ugualmente al di là di sta parte cunsultativa, una funzione nurmativa. In u rispettu di e varietà di u corsu è di u cuncettu di pulinumia, hè urgente di dispone d’arnesi linguistichi efficienti .
 
U Cunsigliu di a Lingua dirigerà i so travaglii nantu à :
•       Cunsultazione nant’à a cuncipitura è a valutazione di a pulitica linguistica
U Cunsigliu, in seduta piena, serà cunsultatu nant’à l’andatu di a pulitica linguistica. Ogni annu, i risultati di a nostra pulitica ci saranu prisentati è discussi.
 
•       Travagli d’elaburazione linguistica
Tuccarà à u Cunsigliu di travaglià à l’elaburazione d’un dizziunariu mutualizendu e risorse, e cumpetenze è e vulintà in direzzione di un prugettu cumunu. L’ultimi sviluppi di a lingua corsa in i duminii novi d’usu è di spressione dicenu quant’ella hè forte a brama di lingua, quantu a nostra lingua pò buscà risorse proprie ma dinù quantu ella hè urgente a so attrazzera, chì per avà hè debbule. Troppu spessu, sò in usu parechje terminulugie sfarente per i neulugisimi. Ùn pudemu, per lascia corre è abbandonu o per uppusizione sistematica à mudelli d’elaburazione sfarenti da u nostru, lascià à ogni lucutore a rispunsabilità di creà e so propie parolle per designà cuncetti novi.

U cunsigliu di a lingua corsa hè un organu cunsultativu è di travagliu di l’Assemblea di Corsica.
 
Hè cumpostu cusì:
 
•       U cumitatu di rigiru
U cumitatu di rigiru di u Cunsigliu di a lingua corsa è di l’Accademia di a lingua corsa hè cumpostu da : U presidente di u Cunsigliu di a lingua corsa, u Presidente di l’Accademia corsa di i Vagabondi, i presidenti è i rapurtori di e cummissione è i ripresententi di a direzzione di a lingua corsa. Purterà u ragiunamentu in direzzione di i travagli d’elaburazione è di valutazione di i piani Lingua 2020 è Lingua 2030. Un bilanciu d’attività li serà presentatu duie volte à l’annu.
 
•       L’Accademia Corsa di i Vagabondi
. Esciuta da u Cunsigliu di a lingua, l’Accademia corsa di i Vagabondi serà cumposta da u cumitatu da l’Universitarii, da l’esperti è da i membri di u fora. Averà à u so capu un Presidente elettu esciutu da u cullegiu di l’Universitarii o di l’esperti. Sò accumpagnati in a so azzione da a direzzione di a lingua corsa.
 
•        E cummissione
U Cunsigliu di a lingua corsa tene quatru cummissione :

• Cummissione Educazione
• Cummissione per a tupunimia corsa
• Cummissione per a prumuzione di a lingua in i media
• Cummissione lingua è suceta

 L’Accademia corsa di i Vagabondi hè in carica di a prumuzione di l’arte è di a literatura, ma dinù di a terminulugia
 
Sta struttura tene duie cummissione :

• Cummissione per a terminulugia di a lingua corsa
• Cummissione per a literatura

A cummissione Educazione hà per funzione di purtà spertizia, di sprime pruposte è di participà à u seguitu di a messa in
opera di u pianu di sviluppu di l’insignamentu di a lingua corsa. Assoccia tutt’ a diversità di l’attori di l’educazione.

U rapurtore di a Cummissione Educazione hè Pasquale Ottavi, Maestru di cunferenza à l'Università di Corsica, Decanu di a faculta di lettere di l'Università di Corsica.

A Cummissione per a tupunimia corsa travaglia à u censu di a tupunimia corsa, à l’elaburazione di a tupunimia di l’esonimi
è s’impegna à prò di l’usu di a tupunimia corsa da l’istituzione.

U rapurtore di a Cummissione per a tupunimia corsa hè Stella Medori, Maestra di cunferenza à l'Università di Corsica

A Cummissione per a prumuzione di a lingua in i media è in a creazione s’impegna per a diffusione di a lingua nant’à a radiu, a televisiò, a stampa scritta, Internet è tutti l’altri puntelli d’usu ghjurnalaghju in a vita muderna. A creazione in generale serà valurizata è sustinuta da sta cummissione.

U rapurtore di a Cummissione per a prumuzione di a lingua in i media hè Pasquale Ottavi, Maestru di cunferenza à l'Università di Corsica, Decanu di a faculta di lettere di l'Università di Corsica.

A Cummissione lingua è sucetà participeghja à l’inchieste di valutazione di a pratica linguistica, à l’elaburazione di e pianificazione è à a so valutazione. Prupone arnesi di misura è s’impegna in quantu à a diffusione sucetale, istituziunale è à l’arradichera suciale di a lingua.

U rapurtore di a Cummissione lingua è sucetà hè Rumanu Colonna, Duttore in suciolinguistica 

A Cummissione per a terminulugia di a lingua corsa s’impegna à scioglie i prublemi di gramatica, à publicà un opera generale nant’à a gramatica, l’urtugrafia, a sinstassa, a cunghjucazione, ma dinù puntelli di vulgarisazione. Hà dinù per scopu di porghje à l’inseme di a pupulazione strumenti i più adattati à i bisogni di l’usu oghjincu di a lingua. Hà per missione di tene u lessicu di u tesoru di a lingua corsa, ma dinù di creà in u spiritu di a lingua è di u mantenimentu di a cummunicazione, parolle muderne ch’ella abbisogna a lingua per pudè campà oghje è dumane.

U rapurtore di a Cummissione terminulugia dia lingua corsa hè Alanu di meglio Prufessore di l'Università à lIUFM di Corsica, respunsevule di u Master Prufessore di e scole.

A Cummissione per a literatura corsa rimette u Premiu di a u libru corsu di a CTC, urganizeghja azzione di prumuzione è tutte l’attività ch’ella ghjudicherà di primura per a sparghjera di a cunniscenza di a literatura corsa.

U rapurtore di a Cumissione per a literatura corsa hè Geniu Gherardi, Prufessore à l'Università di Corsica