GHJURNATE LINGUIMONDI 2012

  MEDITERRANIU IN PUESIA
                     
I scontri puetichi di l'edizione 2012 di e ghjurnate Linguimondi anu sucitatu interressu è passione. Ghjacumu Thiers hà cundutu sti scambii cù a sensibilità e a maestria chè no li cunniscemu; cusì si sò pussutu scumparte opere in sferente lingue, cu sferente espressività di forma, cum'è e puesie scritte, cuntate o cantate, què, davantu à un publicu iniziatu.


Ghjacumu Thiers (pueta, scrivanu, crunistu, dramaturgu), Patriziu Croce (pueta, cantadore), Antone Ciosi (cantadore, cuntadore, pueta), Silvan Chabaud (pueta è cantadore occitanicu), Adrian Grima (pueta è scrivanu maltese) sò stati l'imbasciatori di u mondu di a puesia è anu sappiutu scumparte cun publicu passiunatu i so sferenti linguaghji.



 

L'EDUCAZIONE BISLINGUA IN CORSICA È IN PAESE BASCU : RIESCITA SCULARE, CUESIONE SUCIALE È DIFFUSIONE SUCETALE

Dopu à una presentazione di u storicu di l'azzione militante linguistica basca dapoi 50 anni avemu assistutu à a presentazione di duie cumpunente di u sviluppu è di a difesa di a lingua basca in e duie grande filiere di l'educazione naziunale ch'elle sò l'educazione publica è l'educazione privata.
Sta cunferenza è u dibattitu chì hà seguitatu sò stati l'occasione di paragunà a situazione corsa chì s'hè sviluppata in u sistema educativu publicu, cù u sistema sviluppatu in Paese Bascu, sopratuttu cù e scole d'immersione Ikastola di l'associu Seaska, in l'educazione privata. S'hè pussutu scopre dinù l'azzione purtate è l'avanzate ottenute à u livellu publicu da Biga Bai associu di i parenti d'elevi baschi di l'insignamentu publicu. 
Un scambiu riccu per via di l'analisi di i risultati ottenuti in termine d'amparere , di cumpetenze è di pratiche linguistiche in Paese Bascu è in Corsica.


 Cù l'interveneti:

Jean-Michel Etchegaray, Direttore pedagogicu di l'associu d'insignamentu di u bascu Seaska.
Evelyne Capelier, Presidente di l'associu di i parenti d'elevi di l'insignamentu bislinguu in Paese Bascu Biga Bai.
Alanu Di Melio, Prufessore à l'Università di Corsica, Rispunsevule di u Master prufessore di e scole.
Dumenica Verdoni, Prufessore à l'Università di Corsica, Direttrice di l'IUFM.
Sébastien Quenot, Duttore in lingue è culture regiunale, Capiserviziu di u Cunsigliu linguisticu.

LINGUA È SVILUPPU SUCIOECONOMICU: L'ESEMPIU DI U PAESE DI GALLIA, PRUGETTI PER A CORSICA

A cunferenza purtendu nantu à a lingua è u sviluppu sucioeconomicu hè stata una stonda forte di ste ghjurnate Linguimondi. Avemu pussutu scopre duie presentazione di ciò chì si facce in altre regione eurupee. Infatti a presentazione di l'azzione di prumuzione è di diffusione di u gallese in Gallia, sia in i media (per via di S4C) o sia per l'Associu culturale è spurtivu Urdd Gobaith Cymru ci hà mustratu un avvicinata originale di sparghjera di a lingua ; cusì, s'hè pussutu scopre una televisiò, S4C, chì emette 100% di u so prugramma in gallese è chì prupone prugrammi d'una grande qualità . Hè una riescita linguistica è televisiva, chì tocca un publicu sempre più impurtante è sempre più giovanu.
Efa Gruffud Jones, a presidente d'Urdd Gobaith Cymru, un istituzione in Paese di Gallia ci hà presentatu u so associu l’Urdd Gobaith Cymru chì si puderia traduce da : Lega Gallese di a Speranza o dinù Lega Gallese di a Ghjuventu fundata in u 1922 è chì hà per scopu di dà à i zitelli è à i giovani a pussibilità d’amparà è di sucializà si à traversu a lingua gallese. Sò più di 50 000 i zitelli è i giovani à esse ne socii.
In paragone à sti dui mezi di sviluppu è di sparghjera di a lingua in Paese di Gallia hè stata presentata a chjama territuriale à prugetti per a prumuzione di a lingua corsa in a vita ecunomica, un avanzata in u duminiu di a lingua chì vene fà cresce a piazza di più in più impurtante di u corsu in i prugetti ecunomichì , cultarali è suciali
 


Cù l'intervenenti:

Garffild Lloyd Lewis Direttore di cummunicazione di u canale S4C, (canale di televisiò in lingua gallese)
Efa Gruffud Jones Presidente di l’Urdd Gobaith Cymru (lega di a ghjuventu gallese cuntendu più di 50 000 socii)
Roland Nicolas Frias incaricatu di missione cumunicazione è lingua corsa à l'ADEC .