Maria Stella (Santu Casta), edizione Misteri, 2013
Per quelli chì anu lettu u rumanzu precedente di Casta U Ingallaratu diceremu chì l’originalità di questu tene à u persunaghju principale Maria Stella chì saria appuntu a prumessa di Tiadoru Poli, quellu Alisgianincu partutu in guerra in u 1940 è propiu « ingallaratu » da i successi tremendi di a Storia in parechji paesi d’Auropa. Ripresa simile ùn hè cusì cumuna in u rumanzu corsu, postu ch’è no truvemu subitu à Maria Stella digià partuta da u paese d’origine, ma sempre innamurata, in cerca di Tiadoru pè issi nordi duv’ella pensa di pudellu ritruvà. Hè dunque u viaghju, sò i scontri diversi ch’ella face, è daveru l’acculturazione à l’usi, à e lingue, à a ghjente chì portanu u rumanzu fin’à u matrimoniu di l’anziana prumessa è a creazione d’une famigliola fora di Corsica. In fin di u libru, issa storia face ritruvà à Tiadoru in l’isula nativa, duv’ellu hè stabilitu è affigliulatu cù una sposa alemana, ognunu avendu in fin di contu fattu a so vita da u so cantu… ancu sì i sintimi vechji ùn parenu micca affattu spinti.
