Seduta di u 16 di nuvembre - Discorsu di Pascal Zagnoli*, Vici Presidente di l'Assemblea di a Giuventù

Madama a Prisidenti di l’AC,
Sgiò Prisidenti di u CE,
Cari Culleghi,
 
 
Sò filici di ritruvà vi oghji, 4 mesi dopu a a nostra ultima sessioni. Ci ritruvemi sempri cù a stessa vulintà di travaglià a pro di ssu paesi è di u so avvena. Oghji sò 4 rapporti chi sarani prisintati è spergu vutati. Mostrani a capacità di st’assemblea di travaglià annant’à tutt’i sughjetti chì intaressani a Corsica è i cumpetenzi di a Cullitività di Corsica. Una volta di più, a nostra assemblea issu dopu meziornu travagliarà annant’à sughjetti impurtantessimi cumè a mubilità di i ghjovani studienti, l’insignamentu di a lingua è a Storia Corsa, ma dinò di i prublematichi d’attualità chì sò a saluta mintali di i ghjovani è sopratuttu i dispusitivi d’aiuti a i donni vittimi di viulenzi.
 
Pruvemi di truvà sempri di più soluzioni è piani d’azzioni ; discutendu è travagliendu trà di noi, ind’a diversità di i nostri ideii chi faci a ricchezza di ssi travaglii.
 
È ancu si no travagliemi in cumissioni ò in sessioni annant’à ssi sughjetti, ùn ci pudemi micca scurdà di i nostri fundamenti cumincendu da i prigiuneri pulitichi. Quasgi dui mesi fà, a dumanda di libarazioni di Petru Alessandri era ricusata da a corti d’appel di Parigi. Ssa decisioni ind’u stessu tempu chì u prucessu dittu « storicu » trà a Corsica è Parigi intarrugava. Facini quasgi 25 anni chì Alanu Ferrandi è Petru Alessandri sò in prigiò, è ci ani da fà creda chì i so libarazioni pudariani fà crescia un risicu di « riscossi publichi » ? Par nò, a quistioni di i prigiuneri devi essa trattata  cumè l’hè statu fattu ogni volti chì un paesi cintrali hà truvatu una soluzioni pulitica cù un populu. Allora ssu dopu meziornu, vutaremi una volta di più, una volta di troppu una deliberazioni chì dumanda a libarazioni di i prigiuneri pulitichi ch’ani fatti i so anni di prigiò. Micca l’amnistia, ò una dicisioni pulitica, u drittu è solu u drittu.
 
È dopu parlaremi di i discussioni cù u statu. Ramintendu ch’eddi sò accaduti dopu a a morti di un patriottu, è dopu a qualchi sittimani di manifestazioni, di baruffi, è di viulenza. Ramintendu chì quandu a demucrazia ci hà impeditu di truvà una soluzioni stituziunali, ci hè statu bisognu di a forza è di u soffiu di a giuventù da ramintà a u statu chi u populu Corsu ùn era ancu mortu.
 
È avà, a chi ne semi ? Aspittemi. Di sicura, hè difficiuli l’affari. I ghjovani chi no semi, vuleni sempri andà à l’infuria, ma noi dinò siami cuscenti chì ci voli a essa pazienti.
 
Ma a pazienza ùn voli micca dì passività. Allora a modu nostru, saremi qui, par fà valè i nostri rivindicazioni. Par dì chì ssu pezzu di tarra ind’u meditaranniu t’hà a so storia è a so legitimita pà rivindicà un statutu puliticu chì assicura a suvranità di ssu paesi.
 
Cumpiaraghju cù una pinsata pà Ghjuvan’Battista Acquaviva. Eri, facia 35 anni ch’eddu era tombu. Ind’u libru « Salute Patriotti » pudemi ritruvà un strattu d’umaggiu chi si compia dicendu : « Ghjuvan’Battista restera à jamais vivant dans la mémoire populaire. Mortu per a corsica. Tes frères d’armes inclinent leur drapeau sur ta tombe. La lutte continue. Nos morts sont des vivants mêlés à nos combats ».
 
Allora pà i naziunalisti di a prima ora, d’arimani, ò di dumani, ramintemu ci chì semi l’eredi di ghjenti ch’ani sacrificatu tuttu pà a Corsica. È solu par edda.